23-сәуір – Ұлттық кітап күніне орай мектебімізде "Кітап – сарқылмас қазына" атты әдеби кеш ұйымдастырылды. Әдеби шараға жергілікті ақын Самат Мәненұлы арнайы қонақ ретінде шақырылып, оқушылармен әсерлі кездесу өткізді.
Кеш барысында алдымен ақын туралы арнайы бейнебаян көрсетіліп, оның өмір жолы мен шығармашылығы жайында тың мәліметтер ұсынылды. Оқушылар мен ұстаздар ақынның поэзиясымен жақынырақ танысып, шығармашылық әлеміне саяхат жасады.
Бейнебаяннан кейін Самат Мәненұлы өзі сөз алып, жиналған қауымға шығармашылығының бастау алған кезі, шабыт көздері және әдебиетке деген сүйіспеншілігі туралы әсерлі әңгіме өрбітті. Оқушылар ақын өлеңдерінен үзінділер оқыды.
Кездесу сұрақ-жауап түрінде жалғасын тауып, оқушылар ақынға өздерін қызықтырған сауалдарын қойды. Ақын барлық сұрақтарға шынайы әрі әсерлі жауап беріп, жастарға кітап оқудың, білім мен өнердің маңызын ерекше атап өтті.
Кеш соңында мектеп директорының міндетін атқарушы Д. Абишев құттықтау сөз сөйлеп, ақынға алғысын білдіріп, оның шығармашылығына табыс тіледі. Сонымен қатар бастауыш сынып мұғалімі Азамат Гулбаршын өзінің ақынға арнау өлеңін оқып, кештің шырайын аша түсті.
Ақын ағамызға кітапханашылар атынан сый- сыяпат табыс етілді.
